Deir Noel Thomas go bhfuil díomá ar go leor daoine faoi chlár bóithre na Gaillimhe agus an Rialtas tar éis an contae a fhágáil ar gcúl arís

Deir comhairleoir Eire Neamhspleach, Noel Thomas, go bhfuil díomá mhór ar go leor daoine ar fud Chontae na Gaillimhe nach bhfuil a mbóithre féin san áireamh sa chlár bóithre atá sínithe don bhliain seo.

Dúirt an Comhairleoir Thomas gur throid sé féin agus a chomhghleacaithe le oiread bóithre agus ab fhéidir a chur san áireamh, ach nach raibh sé indéanta freastal ar an éileamh mar gheall ar an easpa maoinithe chuí ón Rialtas.

“Tá go leor daoine fágtha míshásta agus is ceart sin a rá go hoscailte,” a dúirt an Comhairleoir Noel Thomas.

“Tá bóithre ar fud an chontae nár éirigh linn a chur isteach sa chlár, cé go bhfuil géarghá leo. Ní mar nach bhfuil an gá ann atá sé, ach mar nach bhfuil an maoiniú ceart á chur ar fáil ag na páirtithe Rialtais.”

Dúirt sé go bhfuil Gaillimh fágtha ar gcúl le blianta fada anuas nuair a bhreathnaítear ar an maoiniú a fhaigheann sí i gcomparáid lena méid daonra agus lena riachtanais.

“Tá sé soiléir le fada go bhfuil Gaillimh thíos leis i leith leithdháiltí stáit. Tá an contae seo fágtha ar gcúl ar bhonn daonra thar thréimhsí fada agus thar iliomad scéimeanna maoinithe. Is iad pobal na tuaithe, teaghlaigh, feirmeoirí agus lucht gnó atá thíos leis sin ansin.”

Dúirt an Comhairleoir Thomas go gcaithfear deireadh a chur leis an gcur chuige seo agus infheistíocht chothrom cheart a dhéanamh i nGaillimh.

“Ní féidir a bheith ag súil go nglacfaidh daoine leis seo bliain i ndiaidh bliana. Tá bóithre áitiúla agus réigiúnacha ina mbunriachtanas do shaol laethúil daoine, do shábháilteacht, do ghnó agus do nascacht tuaithe.

“Caithfear troid ar son gach euro agus gach pingin atá ar fáil, agus leanfaidh mise orm ag déanamh sin. Ach is í an fhírinne lom ná seo: dá mbeadh maoiniú ceart á chur ar fáil ag an Rialtas, bheadh i bhfad níos mó bóithre san áireamh agus i bhfad níos lú daoine fágtha díomách.”

Dúirt sé go leanfaidh sé air ag brú ar son maoiniú níos cothroime do Ghaillimh agus ar son na mbóithre nár éirigh leo a chur san áireamh an uair seo.

“Tá an obair sin le leanúint. Ní mór dúinn seasamh an fhóid do Ghaillimh agus a chinntiú nach bhfágtar an contae seo ar deireadh an liosta arís.”